ખુશી દેજે જમાનાને

,ખુશી દેજે જમાનાને  મને હરદમ રુદન દેજે;

અવરને આપજે ગુલશન,મને વેરાન વન દેજે.

સદાયે દુઃખમાં મલકે મને એવાં સ્વજન દેજે;

ખિઝાંમાં પણ ન કરમાયે મને એવાં સુમન દેજે.

જમાનાનાં બધાં પુણ્યો જમાનાને મુબારક હો;

હું પરખું પાપને મારાં,મને એવાં નયન દેજે.

હું મુક્તિ કેરો ચાહક છું,મને બંધન નથી ગમતાં;

કમળ બિડાય તે પહેલાં ભ્રમરને ઉડ્ડયન દેજે.

સ્વમાની છું,કદી વિણ આવકારે ત્યાં નહીં આવું;

અગર તું દઈ શકે મુજને તો ધરતી પર ગગન દેજે.

ખુદા યા!આટલી તુજને વિનંતી છે આ ‘નાઝિર’ની;

રહે જેનાથી અણનમ શીશ મુજને એ નમન દેજે.